11.07.2006 14:27:59 / annska
Svo kom löggimann og hirti hann og stakk honum beint oní rassvasann!
Nóttin
í nótt einkenndist af einstaklega litlum svefni og mikilli
ógleði. Í morgun átti ég svo tíma í mæðraskoðun og fór út í
bíl tætt og þreytuleg. Ég var að sjálfsögðu á seinustu stundu
eins og alltaf og ekkert mátti útaf bregða ef ég ætti að ná
tímanum. Þegar ég var komin rétt rúmlega hálfa leið stoppaði
löggan mig. Löggimann spurði um ökuskírteini og sagði mér að
þetta væri bara reglulegt eftirlit. Ég að sjálfsögðu á
seinustu stundu mátti ekki beint vera að þessu. Lögginn
skoðaði ökuskírteinið mitt og horfði svo á mig í smá stund og
sagði svo: ,,þú ert nú ansi þreytuleg, hefurðu verið að
drekka?" Þessu átti ég ekki von á og fór að hlæja, honum var
ekki skemmt og sagði mér að ölvunarakstur væri ekkert til að
skopast með! Þegar ég svo sagði honum að það væri nú
yfirleitt ekki talið hollt að drekka á 8 mánuði meðgöngu
áttaði hann sig á ástandi mínu og leyfði mér að halda áfram
för minni. Þegar ég kíkti á mig í speglinum áttaði ég mig
alveg á því af hverju löggimann spurði, ég var rauð í
augunum, tuskuleg og hvítari í framan en Oddskarð er á
snjóþungum degi! Ég lít sko greinilega ekki vel út þessa
dagana fyrst löggan er farin að stoppa mig og gruna mig um
ölvunarakstur á þriðjudagsmorgnum! 